وصفة لسحر الأزواج:
الكثير من الزوجات يخافون على أزواجهم من السحر ، وأنا بعطيكن اليوم سحر مضاد تسحرين فيه زوجك وما تقدر أي وحده خايسه برع البيت تسحره !
لكن خلونا نرجع شوي للبنت قبل الزواج واللي فعلا تكون فعلا ساحرة مب بس بالمكياج والرموش الصناعيه اللي ما اختلفنا ان الجمال يضمر مع السنين لكن ساحره بصوتها ، بنظراتها ، وبإهتمامها بانوثنها … وين سارت هذي الأشياء وإلا بعد كان مكياج ويزول بعد الزواج !
الزوجات يقولن ليش الريل يسير يدور وحده ثانية وأنا مسويه له ولعياله كل شي يباه … مستحيل لو محصل كل شي يباه فالبيت بيسير يدور برع البيت … الزوجه تسوي فعلا كل شي لزوجها … لكن لحظة هل لي تسويه الزوجه هو ما يريده الرجل ؟
الزوج ما يبغي أم لعياله وطباخه ومهندسة ديكور ومنسقة حفلات ومفتشة بلدية ولكن يريد نفس البنت لي تزوجها مب بالشكل لكن بالطباع … وإلا بعد الطباع والانوثه تمتش مثل أصباغ المكياج !
وما يؤكد هذا الشيء هو كلام الكثير من الزوجات ان الزوج أحيانا يترك زوجته لمن هي أقل جمالا من الزوجه … أسألي نفسك يا زوجه ليش … يمكن تشل شنطة أحسن من شنطتك … أو موترها احلى من موترك … أو تعاملة معاملة ما يحصلها في البيت !
والله ثم والله ثم والله لو كنت امرأة و زوجه لخليت زوجي يسجد عند ريولي وما بيقدر يفكر في حرمه ثانية أو حتى يطلع ويا ربعه يجلس على القهوة … السحر عندك وأنت تعرفينه … لكن بعطيك مساعده هو مب الصريخ ولا ويع الرأس ولا النجره !
♥ ♥ ♥
قوتك في انوثتك … واذا حاولتي تعاملين الرجل بالقوة والعنف والقسوة والصريخ فستخسرين … لأنه بكل بساطة اقوى منك … لأن الله خلقه كذلك … فكوني أنتِ أيضا كما خلقك الله أنثى جميلة رقيقة .
يرجى من كل الزوجات ارسال رساله حلوه لازواجهم الآن يذكرونهم بحبهم وبشوقهم لهم!
أبدي في السحر من الآن وشوفي النتائج المضمونه !
♥ ♥ ♥
للزوجات اللي يحاولن وما يحققون نتيجه ايجابيه يجربون بطريقة مختلفة …
مثلا اكتبي له عن شيء يحبه … ردي بالذاكرة شوي … ممكن يكون كلام كنت تقولينه له قبل سنوات … لكل زوج مفتاح … ممكن حد من الرجال ستكفيه: ” حبيبي شو تشتهي تتغدا اليوم“
أونه يعني الحين الريال يوم بيسمع حبيبي شو تبى غدا اليوم بيطيح واقف
خلنا نكون شوي مبدعين متميزين … يله كل واحد وشطارته
♥ ♥ ♥
ملاحظة للرجال:
يقولون نفس طريقة السحر تنفع مع النساء الباردات (حسب قول أزواجهم) لو سمحتوا حد يجرب ويخبرنا ؟
أكثر من زوجة تقول لي هذا الكلام ما ينفع مع زوجها ، لأنه قاسي ورأسه يابس وعنيد … الخ!
طبعا أنا توقعت ان الكل بيعرف ان طريقة السحر هذي للأزواج الزينين الحبوبين المحترمين اللي يعاملون زوجاتهم بكل حب وود وألفه!
أما للأزواج الخشنين التعيسين فهذي الطريقة مستحيل تنفع وياهم وما في داعي حتى للمحاوله !
اللي عندها زوج قاسي لازم تراويه العين الحمراء وما تبتسم له أو تقول له كلمه حلوه وبالعكس تعطيه على رأسه وتحاول تضايقه في كل وقت وتطرش له مسجات كريهه تهكّميّه وأول ما يوصل البيت تقول له حتى لو مب صدق ”هاه أكيد نسيت بعد تيب لي قلت لك عليه“ وصدقوني بيصطلب وبيتأدب وبيعامل زوجته معاملة الملكات والأميرات !
المهم هي حياتُكِ وأنتِ حره … ممكن تكون حلوه … وممكن تكون مره … لكن تذكري ان بيدكِ أنتِ السيطره !
للأزواج اللي يرقودن لين المغرب وينشّون ويطلعون قهاوي أو هياته أو لين الفجر … وصفة سحرية بس هذي لازم تكتبينها على ورقه
خذي ورقة صغيرة واكتبي عليها جمله أو جملتين لا تكثرين .. لا تكتبين قصة حياتك .. الرياييل ما يحبون الهذربان والهرج الزايد … بعد ما تكتبينها حطيها في جيب كندورته ولا تبينين له شي وخليه يطلع كالعاده
شو تكتبين … استخدمي مخيلتك … لكن نصيحه لا تكتبين شي مثل ”خاف الله أنت هايت برع وأنا بروحي ويا اليهال بين أربع جدران“
جربي شي مثل ”حاول ما تتأخر لأنك وحشتني“ … إذا عليها رشة عطر بعد ما يضر
♥ ♥ ♥
تجربة فعلية لـ ”سحر الأزواج“
قصة حقيقية ترويها لنا زوجة كانت بائسة
تقول الزوجة الحزينة :
أحدى الزوجات كانت تضحك وتستهزئ من نصيحة ”سحر الأزواج“ وتقول انه ما في فايده بعد عشر سنوات زواج وعدة نكبات فكيف يمكن لبضع كلمات أو نظرة أو مجرد رسالة حلوه ان تغير أي شيء !!!
ولكنها قررت التجربة يمكن من دافع الفضول أو لتثبت لنفسها ان الوضع فعلا بائس ويائس …
ولكنها جربت ….
”طرشت له مسج حلو وكتبت له صباح الخير حبيبي“
وتتابع .. ”بعدين طرشت له مسج عن الحب بعدها بساعتين“
وصدمت الزوجه عندما اتصل بها زوجها على غير عادته ليسولف معها و لما وصل الى البيت قام يلاعب ابنه الصغير وتضيف بأنه قرر أيضا ان لا ينام الظهر كعادته وانهم سيخرجون معا لشراء بعض الأشياء بدون ان تطلب منه ذلك !
وتضيف انها تتفرج على الموقف برمته مذهولة مصدومة فإذا كان مجرد مسج صغير فعل كل هذا فكيف لو حاولت أكثر وأكثر !
وتعلق مختتمة حديثها قائلة :
”الحين صدقت ان الرياييل ينقص عليهم بسرعه“
والرياييل يقولون: “ما عليه قصوا علينا نحن راضين مب مشكلة”
مع تمنياتي لكم بحياة زوجية سحرية
عــبداللـه @ الــعــنــزروت™
وشكراً لمروركم ونشركم للوعي
لو سمحت أستمع للشرح التالي حتى تستفيد بشكل أمثل من الموقع ⇓
كذلك أتمنى منك تصفح عناوين كل مواضيع الموقع على الرابط التالي فقد تجد ما تبحث عنه
Widget not in any sidebars
فعﻻ جربت كل لعم تحكي عنو زوجي كتير تغير حتى اذا بعت رساله في اليل اني مشتاقه اقعد معو بيجي بدو مجامعتي بدون طلب شكرا كتير غيرت حياتي كتير بسببك
العفو يا بنتي ولكنك أنت فعلاً من غيرت حياتك لأنك فكرت بإيجابية وقررت أن تحاولي وقررت أن تغيري من حياتك .. أسأل الله لك ولكل من يحاول إصلاح حياته التوفيق .. والتوفيق كله من الله سبحانه وتعالى
اخوي عبدالله حاولت أطبق سحر الأزواج ولكن بعد فوات الفوت بعد ما تعلق زوجي بامرأة أخرى أقل مني شكلا وأخلاقا وأصبح يرى اهتمامي ثقيل عليه وعلى قلبه وهو الآن 24 ساعة تقريبا مع هالمراءة حتى وهو جالس بجنبي يتحدث معها على الواتسب هو لايعلم اني أرى ويحترق قلبي بصمت أشعر بأن فقدت الأمل في تركها وعودته الي وإلى بيته
أقرأي موضوع “الزوجة الثانية .. حلم كل زوج وكابوس للزوجة .. مقال انصح كل زوج وزوجة بقرائته“
الحمدلله ع تمام النعمه فعلا مش كل شي ينطبق ع كل الرجال وبعض الحركات استخفها وما احس انها بتونس زوجي كل رجل وطبيعته واسلوبه الخاص مثل زوجي تلفونه طول وقت الدوام مقفل وقليل يفتحه او ينتبه للرسايل النصيه والواتسب مغلق وانا بعد اكون مرهقه بالدوام ومشغوله بس بالبيت فانا لما اكون فوق وهو تحت ارسله غمزات او اقوله تعال وحشتني واجلس اتطنز معه بالرسايل او اكون كسوله مالي خلق لشي ويجلس يتحرش واكمل مالي خلق وفجاه اهجم اخلي روحه تطلع هههه
او اكون عند اهلي ارسل صوره حلوه لي مع بنته بحركه يحبها بس لما يكون مع ربعه اقلل جدا تواصلي معه عشان اسمح له يحس شوي انه عزوبي من يرجع اساله هاه شو الفيلم الي شفته وعاد يجلس يسولف ويعلمني بروحه ويش صار معاهم او مين شاف
فاعتقد فعلا لكل رجل مدخل الي يتناسب مع نمط شخصيتك وطبيعتك وعمرك بنت ١٨ غير اسلوبها عن نضج بنت ٣٠
أختي أنتبهي بارك الله فيك تراه الموقع هذا يزورونه الآلاف من كل العرب ومن كل دول العالم ، واذا أكثرت من كتابة أشياء شخصية قد يعرف النساء من أنت
طبعاً أنا ما عندي مشكلة فهي حياتك أنت لا أنا ولكن بس قلت أنبهك لأن أغلب الزوار الجدد ما يعرفون مدى شهرة الموقع ويعتقدون أنهم لقو موقع محد يعرف عنه ومحد بيقراه لو كتبوا فيه شي ، ولهذا الشبب أضفت مؤخراً عدد زوار الصفحات
وحياك الله زائرة ومقيمة دائمة في العنزروت
مدري كأنه آخر رد لي أن شاء الله النصيحة نحطهها ع الرأس ونطبقا يطيب خاطر
انا عفويه خاصه لما اندمج مع المواضيع كثير اتفاعل معها نفسيا بس فعلا ملاحظه انه احنا معشر النساء
لما نجلس جلسه حواريه مع بعض نطبق أي حاجه نجحت مع وحده فينا بغض النظر عن طبيعه شخصيتها
أو شخصيه الزوج قالوا رسايل غرام بيطفح تلفون الرجال من كثرتها بلا سبب اذا واحد نجحت معه الشموع
راحت الثانيه ما خلت شمعه بالسوق والرجال يصير بموقف ما يبغي يحرجها يقولها حلو
يعني مفترض كل وحده تحلل زوجها كإنسان بعيد عن غاياتها هو كشخص عندنا تحلل وفقا لاحتياجات ومدى
تجاوب معها كذا ما بتعرف حقيقه وش يحب ومع السنوات يمل يمشي وهي تتفاجيء فجأه انه معاد يهتم
وما تلاحظ بريق عيونه أو الابتسامه الي من القلب يصير رجل كسول بالحب الرجل نفس أولادك كل واحد
مختلف عن الثاني واحد عادي تتطنزي معه واحد جدي ما يحب الضحك الزايد واحد مهم عنده البرستيج واحد
تعذيب نفسي كله يحب ع كل شي يسوي قضيه حتى الشموع بحسابك بسعرها😕
أختي ما قصدت لا تعلقين بس حبيت أوضح لك
لأن كثير حريم يكتبون ويكتبون وبعدين يرجعون لي ويقولون لو سمحت أمسح تعليقاتنا ومسح التعليقات والبحث عنها أحياناً يأخذ وقت طويل منها
أفضل شي أنك تعلقين فالموقع ماله ثيمة بدون تفاعلكم ولكن بدون ذكر أشياء شخصية تدل على صاحبة التعليق بشكل واضح ومباشر
تم ولا يهمك
هل صحيح ما تقولة كثير من النساء ان الرجل يحب الغموض يعني ان تكون الزوجة غامضة و ان تهتم بنفسها اكثر و ان لا تكون ملازمة له يعني تعطي لنفسها اهتمام و ان لا تكثر مثلا الاتصال به و التغزل به كي لا يمل ..
ما غير الإكثار من الإتصال به … أما بقية الأشياء فهي كلام فاضي عند كل الرجال.