زوجة جميلة من قلة ما يمدح زوجها أصبحت تحس بأنها خسفه .. تشعر بأنها كما يقول المثل “الغزالة في عين راعيها بقره” … الحل

Gazal

تقول زوجة:

 شو الحل ويا الريال الي مايمدح ويتغزل بزوجته .. بالرغم من انها تسمع كلمات المديح بجمالها واناقتها من جميع لي حوالينها .. الا اهم شخص فحياتها مب معبرنها وهي محتاجه تسمع منه هو عشان ترضي الانثى لي داخلها .. ويوم صارحت ريلها قالها مااحب امدح عشان ماتبطرين!! وتشوفين عمرج!!

وضحت له الموضوع مب جي والحرمة محتاية تسمع من ريلها وتحب المدح والغزل

قال ما اعرف اتغززل وقول كلام حلو!!

مع العلم في بداية الزواج كانت له علاقاات وانتهت .. وحرمته كانت تقرا المديح والغزل لي كان يطرشه لهن!!

صارلها معرسه 5 سنين وقالها انتي حلوة 3 مرات .. وصارت يوم اييها ريلها تطلب منه يقول بالاول غزل وعقب تعطيه لي يبا وزياده عل وعسى يبادر من نفسه … ومافي فايدة

وهي من النوع لي تمدحه وتمدح كشخته .. وبالمقابل مافي شي من صووبة .. يحسسها انها عادية جدا جدا وهي عمرها ماشافت عمرها عليه ولا تكبرت .. والحين صارت تحس عمرها خسفة جدامة .. وهي بالواقع جميلة

يمكن تشوفها مشكله سخيفه .. لكن اتمنى القى حل قبل لا تنعدم ثقتها بنفسها

العنزروت :

بالعكس مشكله مب سخيفه ومهمه بعد ، والموضوع جزء منه نفسي ، باختصار أي شي تشوفه كل يوم تتبرمج عليه وتتعود عليه ، وهذا الشي متساوي عند الرجل والمرأه ، يعني أول ما يشوف الرجل أي حرمه حلوه يفتن من أول وهله ، ولنفرض أنها زميلة عمل مثلاً أول يوم ملكة جمال ، بعد أسبوع يبدأ يلاحظ بعض العيوب والشوائب ، بعد شهر تبدو الزميله جداَ عاديه ، بعد كم شهر يمكن خسفه .. ونفس الشي بالنسبه لزوجته!

الزبده أنه بعد فتره يتعود الزوج على الزوجه وفعلياً حتى أصلاً ما يشوف شلكها ولا ويها ، فقط يحس بوجودها ، وهنا الفخ الذي تقع فيه أغلب الزوجات ، وسامح الله من يكرر موضوع اللبس والكشخه ، ولكني أبصم لكم بالعشره أن الزوج لو الود خلى حرمته مفصخه بدون لبس ، المهم وكما ذكرت سابقاً في موضوع الرومانسية ، المعامله وأقصد حسن المعاملة طبعاً أهم من اللبس .. فجمال الأنثى ينبع من الداخل وليس من الخارج ، خصوصاً بعد الحمال وتعاقب السنين.

عيل ليش الحرمه تمدح الزوج حتى بعد سنوات .. معناته الرياييل هم اللي فيهم الخلل … ههههههه بصراحه لا .. أغلب الحريم مبرمجين أنهم يمدحون لأنهم كل يوم يسوون جذه مع الكل .. الله لطّوف ما شاء الله شو هالشياكه وين مفصله العباه .. حتى لو العباه تلوع بالكبد … ما شاء الله ميثوه بيتك روعه .. حتى لو الالوان تسبب العمى … اوووه حصّوه شو هذا الخاتم يخبّل .. حتى لو كان بلاستيك قيمته عشر دراهم .. متى شفتوا حرمه تقول الصدق انه مثلاً نظارة ربيعتها مب شي .. لكن الرياييل غير وما يحتاي أشرح .. عادي كاش .. عبود قسم بالله أنت شفت ويهك بهذي النظاره .. تقول صرصور طايح في المرحاض ههههههههههه.

ولذلك صحيح كل لي حوالينك بيمدحونك لأنهم مبرمجين يمدحون ومب معنى هذا أنك خسفه .. لا مب القصد .. لكنهم يمدحون الكل .. المهم لا تتوقعين أن ريلك بيستوي مثل ربيعاتك .. هذا رجل ونعم الرجل قاسي بطبعه .. وما يلينه العند .. وإياني وإياك ترجعين مره ثانيه للعند مع زوجك .. أول غزل واللا ما بعطيك شي .. هذا أكبر خطأ!!

أنزين وشوه الحل .. والحل في السر الخطير اللي بقوله لكم هنيه .. بس الله يخليكم محد يخبر الرياييل اني قلته لكم .. لأنه ممنوع نحن الرياييل نخبر أسرارنا للحريم .. هذي خيانه عظمى .. السر هو أن الريال من أستوى حتى يوم هوه ياهل ما يحب الرمسه الزايده .. لكن البنات من يوم هن صغار تعال سكتهم اذا تقدر .. وأغلب الأولاد الصغار تشك أن عندهم توحد .. حتى أصلاً نادر البنات يطلع فيهت توحد.

الــحــــل .. ودري الكلام المبرمج وودري حتى أنك تمدحينه .. أغلب الرياييل إذا قالت له زوجته أنه كاشخ يضخك او يقول شو كشخته .. والأذكياء من الرياييل يعرفون أنه حريمهم يجاملونهم .. ويمكن يتضايق حتى من المدح الزايد .. فودري الكلام وافتحي الباب وادخلي قلبه .. يعني فقط بنظره اعجاب .. بلمسه حب .. بدال لا تقولين له: كاشخ حبيبي .. كأنه ولدك الصغير هههه .. قومي وبوسيه على راسه أو ضميه أو أعطيه نظره .. أو اذا لازم لازم لازم لازم تتكلمين .. حريم ما يقدرن بدون كلام ههههههه .. قولي له مثلاً لو الود ودّي ما خليتك تطلع أو تسير الدوام.

أول ما يرجع من الدوام بدل الروتين الممل .. هاه حبيبي كيف كان يومك .. جربي مثلاً تاخذين ايده وتهمزينها لثواني .. تحكّين راسه بعد ما يعق القحفيه أو فقط تعطينه نظرة شوق ووله وبدون كلام .. ما أدري اذا وصلت الفكره واللا لا .. لكن الرجل يحس بجسمه أكثر مما يحس بسمعه .. حيوان تراه ههههههههه .. ومتى ما حس الرجل بحب الأنثى يستوي شاعر بعد من بس كم كلمة مدح .. وما عليك من كلامه عن انك تتبطرين عليه هذي مجرد خرابيط لا تهتمين بها.

والحين أتمنى أن كل الحريم فهموا أن الريال غير عن الحرمه .. ومب بس الفروق الجسديه .. ومع أنه تبونالصدق نفس الشي .. لأن الحرمه تحس من الداخل .. والريال بسبب فرق تكوينه الجسدي فهو يحس من الخارج ههههههههههه .. لكن يا حرمه يا زوجه يا أنثى ما منبع الحب والحنان والرقه والكلام الحلو .. الريال ما فيه رقه وحنان مثلكن .. مع أنه فيه رجال فيهم رقه وحنان وايد .. لكن هذيلا أغلب الحريم ما يبون يتزوجونهم

آخر الكلام .. كسري راس زوجك القاسي .. لكن مب بالزّن والكلام وطولة اللسان .. ولكن بالحب والحنان .. وأهم شي باللمس المباشر لجسد زوجك .. والنظرات بدون كثرة كلام .. وراقبي كيف يذوب أكبر جبل جليد .. وكيف يلين أقسى راس .. ويرق أجفّ قلب.

آخر آخر الكلام ..  للي ما أستوعب الموضوع لين الحين فقط للتوضيح .. تراه مب لازم الزوج يقول الكلام الحلو مجرد معاملته الطيبه وردة فعله تجاه حرمته هي الأهم وليس الكلمات المباشرة.

مع تمنياتي لكم بحياة زوجية سعيدة

عــبداللـه @ الــعــنــزروت™

07a

وشكراً لمروركم ونشركم للوعي

أضغط هنا قبل أن تضيف تعليقك ...

24 رأي على “زوجة جميلة من قلة ما يمدح زوجها أصبحت تحس بأنها خسفه .. تشعر بأنها كما يقول المثل “الغزالة في عين راعيها بقره” … الحل”

  1. حل ماخطر على بالي
    ابهرني حلك ولي تجربه وان شاء الله بتكون نتيجتها مميزه

  2. جزء كبير من الحل انا اطبقه
    قبل طرح المشكلة
    وبعد طرح الحل
    حاولت وحاولت
    حتى تاكدت اني خسفة بنظرة
    مامدحني قبل ولا راح يمدحني
    واذا ماسمعته الحين متى بسمعه
    وانا عيوز وويهي كله تجاعيد؟
    بتينن انا

    من ناحية المعاملة أتعامل وياه
    معاملة طيبة
    لأرمستي زايده ولا طلباتي ماتخلص
    وماحب النكد والمشاكل من استويت

    تعبت نفسيا
    ابا اسمع كلمة اعجاب من صوبه
    مابا اضيع عشان هالسبب

    شو الحل ؟

    1. اعرف انك كنت تطبقين وطبقتي وتطبقين

      لكن ممكن تسوين لي خدمه ..
      ١- شو سويتي بالضبط ؟
      ٢- شو فهمتي من كلامي في الموضوع ؟

      لأنه ياني احساس انه كلامي ما كان مفهوم ولذلك ابغي اتأكد !

      1. زوجي مثلها ، ادري يحبني كثيررررر لكن مايقرب مني وينام بروحه ودايم يذم فشكلي مع اني ادري العكس لكن ليه يسوي كذا وكل مازعلت جاء يراضيني ويهديني ورد وهدايا بس وشو السر انه ينام بروحه فهمني

  3. يعطيك العافية… و المشكلة انها سارت في حياتنا عقدة…… نعتقد لازم الرومنسية بين الزوجين زي اللي في الأفلام و المسلسلات أو زوجك ما يحبك .. جزاك الله الف خير

  4. زوجي دايما يقولي كنت قبلك خاطب وحده وايد جميله وكانت فيها مواصفات حلوه وانا يزيد قهري وأقول كان واحد يباني كنت معجبه بشخصيته

    1. ممتاز ممتاز أكثروا من هذه الأشياء وأنا أضمن لكم مستقبل سعيد هههههههههه أعتقد ما دام أنكم تزوجتم فأنتم لستم أطفال ولذلك يجب أن لا تتصرفوا كالأطفال

        1. تقولين له واكيد رفضت الزواج بك لأنك قبيح … لا لا لا … قولي له هذا الكلام يضايقني وأتمنى ان لا تقوله لي مرة اخرى فنحن الآن بالغين ومتزوجين … وأتمنى أن نتعامل على هذا الاساس … اجبريه برقي ردك على ان يحترمك

          1. والله عجبني هذا الرد المفحم يستخدمه المرة الجاية !! زوجي من النوع اللي يحب التقفيط للاسف يعاملني كواحد من الربع !! ويتنفر مني لما اكون رقيقة زيادة عن اللزوم (مادري ليش متزوج ) 🙂 هو الخسران! !! قررت آكون على طبيعتي واتدافش معاه وأكون صديقة له !!لانه يعبرني اكثر ويسولف معاي عن كل شي !! سبحان الله الرجال انواع *^* !!

  5. ماشاءالله كفيت ووفيت
    الصراحه من احلى المواضيع الي قراتها
    افضل شرح قدمته هو بذا الموضوع ياليت دائما يكون بهالطريقه يعني تذكر امثله واعملي كذا وسوي كذا يعني الحاجات الي يحبها الرجل او تخلينا نملك قلبه
    انا عندي سؤالين متعلقه بذا الموضوع ياليت تجاوب عليها بموضوع مستقل علشان الكل يستفيد او هنا مو مشكله
    الاول هو سؤال او مشكله وانتظر حلها ان شاءالله منك ،، انا زوجي اسمع كلام حلو منه والحمدلله لكن ما الاقي فعل منه يدل على صدق حبه مثلا لو اطلب منه اي طلب بسيط متوسط صعب اي شي اي شي ما ينفذها مهما كانت ضروفه صعبه ولا متيسره رغم اني احاول ما اضغط عليه واطلب وقت لمن اعرف انو معاه ،، هالشخص فعلا يحبني ؟؟ وكيف اخليه ينفذ طلباتي لو على الاقل الي يقدر عليها ما ابغى اكثر ؟؟
    الثاني : زوجي دائما يقولي دلعيني مع انو اسمعه كلام حلو اعطيه بعض اللمسات الحلوه والحانيه طلباته مجابه وبالنسبه للجماع كويس
    ما ادري وش يقصد بدلعيني ؟؟ يعني يبغى زياده ولا فيه شي ناقص ؟؟
    واخر شي مثل ما قلت بامثله الله يخليك ويسعدك

    1. ان شاء الله … لكن اقرأي موضوع .. “زوجي ما يشتري لي موبايل جديد …” فقد يكون به ضالتك

      اما بخصوص التلع للزوج بصراحه اقدر اكتب لكن احس يعني بنوع من الحرج للكتابه عن موضوع يختص بتصرفات النساء .. اخاف بعدين يشكّون فيني الناس هههههه .. لكن اقري موضوع “زوجي يريد ان يقذف في فمي” فهو يشرح حزئية مهمه بهذا الخصوص

      وان شاء الله اكتب موضوع متكامل عن التدلع للزوج متى ما سنحت الفرصه

      1. متى ستكتب؟
        هذا اللغز الذي حيرني.. الأنوثة إحساس داخلي و ابحثي داخلك عن الأنثى المثيرة !! أعرف أنني أنثى .. لكن أحس أنني مثيرة؟!! لست رجلا حتى أرى مدى كوني مثيرة أو … لا أدري لم أفهم شيئا من هذا
        باستثناء التصرفات الحانية و الرقة في التعامل (و التي ذكرتها في بعض مواضيعك) لا أعرف شيئا عن الدلع.. اللهم إلا التكلم بتلك الطريقة الشبيهة بالتخلف العقلي (مثل حليمة بولند مثلا – مع احترامي للمرأة)
        حسب المفهوم الضبابي لدي عن الدلع أنا لا أستطيع أن أعيش مع زوجي بشخصيتين.. مرة طبيعية و “جادة” و مرة أتمايل كأنني إنسان آخر

        أعرف أنه لا يمكن لرجل أن يعلم الأنوثة لامرأة فإذا كان صعبا أن تكتب فلعل المدام تساعدك أو ربما تكتب هي بدلك
        أو ربما يمكن أن تجعل هذا موضوعا تفاعليا تفيدنا فيه “الدلوعات” بخبرتهن و هذا تحت إشرافك طبعا لأننا مللنا من كلام المنتديات.. لا معنى و لا منطق له

        و فقط حبيت أنبهك -إن لم تكن عامدا- البريد الالكتروني إجباري عند التعليق
        الله يوفقك و يحفظك و يسعدك 🙂

        1. قد آخذ باقتراحك ونخلي “الدلوعات” يكتبن لنا من خبرتهن

          ونعم البريد الإلكتروني أصبح شرطاً للتعليق لأني مللت من كثرة من يكتبون تعليقاً وينسون أين كتبوه ومن ثم يسألونني مرات عديدة عن الرد

  6. لو سمحت عندي سؤال مكن البنت تعرف اذا زوجها كويس او لا فترة الملكة وكيف تعرف طبيعته يعني وش تسولف معه مدري اذا فهمت وش ابي اقول بس يعني كيف تكتشف اطباعه .. انا مخطوبة وما كلمته ولا مره وخايفه من انو يكون شيء غير اللي ابيه واتمناه ابي نصيحتك

    1. معرفة إذا كان كويس أو لا شبه مستحيلة حتى لو كان هناك تواصل دائم بين الزوجين في فترة الملكة، فما بالك بمن لا يوحذ بينهم إتصال، وتسولفين معه مثل ما تسولفين مع صديقاتك تتعرفي عليه على ميوله شو يحب وشو ما يحب في كل شي ومن كلامه وميوله واهتماماته وطريقة كلامة تبدأ الزوجة تكوين فكرة او صورة عن زوجها، ولكن الزوج في هذه الفترة أيضاً يكون في حرج من زوجته ولذلك قد لا يكون على طبيعته الحقيقية ١٠٠% ولكن بعد عدة مكالمات وتواصل متى ما أرتاح لزوجته سيتصرف ويتكلم تقريذاً على طبيعته وبدون زيف

  7. طب للاسف انا زوجي متنفعش معاه لاكلام ولا حركات يقلي كل شي ليه وقتو حتا لو حبيت اقرب منو ايه الحل ديما بيصدني

    1. أكتبي لي مشكلتك بكل تفاصيلها عبر الصفحة المخصصة للاستشارات الاسرية في الموقع

  8. لو سمحت ممكن تكتب باللغه العربيه لأن مش كل اللي بيقرا لحضرتك خليجي انا مصريه وفي كلمات كتير مابفهمهاش فمش بستوعب الاجابه كلها علي الأقل بين قوسين وضح معني الكلمه معلش هتعبك معانا كلك ذوق

    1. ان شاء الله .. المقالات القديمه كانت بلهجه خليجيه وتفاديت ذلك في المقالات الأحدث خصوصاً بعد ما أصبح زوار الموقع من شمال أفريقيا يفوق زوار الخليج .. سأعيد كتابة المقال وأوضح الكلمات وأخبرك حال ما انتهى منها

      1. وأتمنى من أعماق قلبي أن يكتب الأخوة والأخوات من مصر الحبيبة باللغة العربية في التعليقات لان فك شفرات ما يكتبون يأخذ الكثير من الوقت والجهد

        وجعلكم ربي سالمين

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *