الصلح خير .. زوجة شابه متخاصمة مع زوجها ومنعته من الاقتراب منها .. اليكم السبب والحل

زوجة تقول:

 متزوجين من ثلاث سنوات وعندنا ولد واحد .. المشاكل بدت معانا من بعد ما أنتقل زوجي للعمل في امارة أخرى .. تغيرت تصرفاته وأخلاقه وقل دينه للأسف .. صار يكلم بنات فـي الشات .. عموما هذي الأمور أنا صبرت عليها .. بس هذا مب معناه أني ما نبهته أني أعرف اللي يسويه .. صاار يكذب علي وايد ويحلف كذب .. دائما يقلل من قدري يقولي أنتي مالك قيمة وانتي هني عبده عندي .. كنت أسكت بالبدايه .. بس قبل اسبوعين قالها لي وبعدها طلب يجامعني وانا رفضت .. قلت له أوّل تعتذر .. قالي لا .. ورجع عاد نفس الكلام .. قلت له مب حرمه إذا خليتك تقربني .. وفعلا ما خليته .. وطلع معصب وترك البيت .. هوه رجع البيت بس لكن من يومها كله يحتقرني وما يكلمني عدل وما اعتذر .. أرجوك لا تطلب مني الاعتذار من زوجي لأنه مايستاهل .. يمكن تقولي ليش سكتي له بالبدايه .. وقد تستغرب إذا قلت لك لأني كنت أحبه فكنت أسكت عنه .. بس السنه الأخيرة  تغيرت مشاعري كليا .. وصرت مااتحمل تصرفاته معاي .. وكرهت تواجدة فـي البيت رغم أنه قليل يكون بالبيت .. الحين ما أعرف كيف اتصرف .. هل اخليه يولي لين يهدأ من نفسه أو شو أسوي بالضبط .. وياليت تنصحني وتوجهني .. وتقولي إذا أنا تصرفت غلط أو لا ؟؟

جواب العنزروت:

بصراحه .. انت غلطانه وهو بعد غلطان .. لكن ليش الله يهديكم جذه .. اللي يحب ما يسوي جذه أبداً

المهم ما تحتاجين تلوّيم زياده لأنه مبين أنك أصلا تلومين نفسك كفايه .. وما بقولك اعتذري (دام أنك طلبتي) اللا إذا انت من نفسك حسيتي أنك تبين تعتذرين من زوجك وحبيبك .. المهم مبين أنكم بعدكم يهال وهذا شيء زين ‏​☺.. وجدامكم درب طويل .. ان شاء يكون مليء بالسعاده

نصيحتي لكم انتوا الاثنين ولكن انت لازم تبادرين

‏​‏​ ◂ كلميه إما مباشرة أو عن طريق الكتابه له إذا كنتِ تخافين ردة فعله أو أنه ما بيخليك تكملين كلامك

‏​‏​ ◂ قولي له أنك تحبينه وانك تبين تتكلمين معاه وبكل صراحه

‏​‏​ ◂ واقعدوا مع بعض وكل واحد يتكلم عن شو لي مزعلنه في الثاني

شروط جلسة المصارحة:

هذي الشروط لازم تحطونها جدامكم والكل يوافق عليها أو شيء شبيه بها لكن ضمن نفس الاطار

• ‏​‏​تكونون في الصالة وليس غرفة النوم إذا أمكن

• ليس أمام الولد

• كل واحد يتكلم في مده تتفقون عليها مثلاً خمس دقايق لكن لا أكثر

• ممنوع المقاطعه اثناء كلام الشخص

• ممنوع السب أو الشتم أو التجريح

• ‏​‏​تتكلمون وأنتوا كل واحد ماسك أيد الثاني واذا بيتخلل الجلسه كم بوسه بعد زين

• تتفقون على الأشياء اللي كل واحد يبغيها من الثاني وبكل صراحه

• ​‏​يفضل أن أمكن تكتبون الأشياء اللي بتتفقون عليها

• ‏​إذا حد صرخ أو احتد صوته اثناء النقاش تتفقون أنكم تأخذون وقت راجه خمس دقايق وأنتوا جالسين نفس المكان لكن بدون كلام

• يفضل أن الجلسه ما تزيد عن الساعه والمفروض تتفقون على هذا من قبل ما تبدون

بعد النقاش قوموا واشكروا بعض … واحتمال يستوي شيء منه كأن يحاول جماعك فلا ترفضي ذلك .. فعند الرجل الجماع تعبير عن الرضا عن الزوجه والاحساس بالحب

وحتى لو ما وصلتوا إلى نتيجه مرضيه للطرفين لأن احتمال تحتاجون أكثر من جلسة مصارحه وما انصح تجلسون أكثر من ساعه

لازم لازم لازم تقعدون مع بعض .. ففقط بالحوار بين الزوجين تنجح العلاقة الزوجيه .. أما بالبعد والجفاء تموت المشاعر .. وهذا هو اللي تحسين به مؤخرا

الحياه حلوه لا تحولونها إلى تعاسه ونكد بيديكم وبسبب عند ومكابر .. والحب حلو واحسن من الكره والخصام بمليون مره

جربي وحتى لو أول جلسه ما نفعت لا تفقدين الأمل لأنكم يمكن مب متعودين على جلسات مصارحه مثل جذه من قبل

يمكن جلستين ثلاث وصدقيني بتحسون براحه نفسيه حتى من أول جلسة

ربي يهديكم ويوفقكم ويسعدكم إِنْ شَــاءَ اللّــه

♥   ♥   ♥

وترد الزوجة المجروحه قائلةً:

شكراً على الرد اللي أسعدني الصراحه .. أسلووبك رائع جدا .. وخاصه يهال هذي عجبتني .. الصراحه أنا ما ندمانه أبدا للتصرف اللي تصرفته معاه لأنه فـي وجهه نظري يستاهل .. طول فتره زواجنا إذا في شيء ما في مواجهه فـي الكلام بينا لأن الغالبيه يكون كلامه كله لف ودوران .. بس هل تنصح أني أكلمه اليوم أو اخليه فتره ؟؟؟!!! أخاف يفهم أني أبا ذاك الشي منه عشان جي أبا اصالحه .. بس أخاف الحوار بينا يتحول لضرابه ..

رد العنزروت :

خير البر عاجله .. وحتى لو كنتِ تبين هذاك الشي شو المشكله .. نصيحه لا تربطون الزعل بالجماع .. ادري أنه هدا صعب لكن إِنْ شَــاءَ اللّــه تقدرون .. المهم كل ما عجلتوا بالصلح كان أفضل .. وإذا ممكن .. اتمنى تخبريني بعد يوم أو يومين شو صار وكيف تصرفتوا

و إِنْ شَــاءَ اللّــه أسمع أخبار طيبه عنكم .. وبالتوفيق

♥   ♥   ♥

وترد الزوجة المحبطة:

إن شاء الله برد عليك إذا كاان في صلح بينا .. مافي مشكله تنشر الاستشارة .. ربي يعطيك العافيه إخوي

ويرد العنزروت متحدياً :

صلح أو غير صلح ردي علي .. إذا انت تقبلين الهزيمه والخساره أنا ما أقبل الانهزام .. راح أخليكم تتصالحون غصباً عنكم ‏​☺

♥   ♥   ♥

وأعتقد أخيراً أقتنعت وترد تقول :

ماعليه لا تحاتي .. برد عليك .. تسلم على الاهتمام

مع تمنياتي لكم بحياة زوجية سعيدة

عــبداللـه @ الــعــنــزروت™

وشكراً لمروركم ونشركم للوعي