زوجي ما يسولف معي .. ما أظن في حرمه ما تقول هذاالكلام .. شو السبب ياترى؟ .. وكيف تخلينه يسولف معك؟

c20c7218cce611e2b2dc22000a9f14bd_7

هذا حال كل الرجال فعلاً .. أو بمعنى أدق هذا هو ما تقوله أغلب الزوجات .. حتى زوجتي تقول نفس الكلام

عزيزتي الزوجة .. الرجل مختلف عن المرأة وكل واحد منكم يبغي يغني على ليلاه ويسولف في مواضيعه ، ومسكين الرجل مطلوب منه يسمع سوالف زوجته اللي نصها ما يفهمها والنص الثاني يحس أنها غير مهمه أصلاً

جربي تخلينه هو يتكلم عن مواضيعه ابتداءً .. فحاولي انتي تبادري وتتكلمي في شي هو يحبه مثل كوره أو سيارات أو العمل أو اللي أنت أدرى به لأنه زوجك وهنيه السؤال “هل تعرفين شو يحب يسولف عنه زوجك” ، وهو بصفته رجل ما بيطول في الكلام مب مثلكم يالحريم .. وبعد شوي انت اهريه بسوالفك لين ما تطلع روحه ، المهم بهذه الطريقه راح مب بس يتكلم ولكن راح يحب الكلام معك ويمكن يسمع شي من الكلام اللي أكيد مهم مناللي تقولينه ، خصوصاً اذا اختصرتي الهذربان والهرج ، وحاول أنك تكونين معاه وقت السوالف كأنك واحد من ربعه الشباب مو بس زوجته المزعجه !

ولا تخلين الموقف الحالي من أنه ما يسولف معك يدفعك للإبتعاد عنه .. بل على العكس تعلقي بزوجك بكل قوتك وتمسكي فيه وخليه يتعلق فيك .. خليك أنت الصدر اللي يفضفض له واسمعي له وشوفي الفرق .. وما يحتاج أقول أنه اذا انت ما سمعتي له احتمال يدور حد يسمع له .. ووقتها قد تخسرين الكثير .. أو تخسرين 50% هذه والله أعلم !

مع تمنياتي لكم بحياة زوجية سعيدة

عــبداللـه @ الــعــنــزروت™

07a

وشكراً لمروركم ونشركم للوعي

12 رأي على “زوجي ما يسولف معي .. ما أظن في حرمه ما تقول هذاالكلام .. شو السبب ياترى؟ .. وكيف تخلينه يسولف معك؟”

  1. طيب واذا مان الزوج يقول لزوجته فكينا من سوالف الدوام..!
    واهله مايحب يسولف عنهم..!
    ولو سولف معها مره وتحمس في السوالف تدري انه يبي فلوس..!

  2. أنزين إذا العكس. أنا من النوع اللي أحب أتكلم وايد. بس زوجتي تمل بسرعه مني

    1. الله يهديها مو حاسه بالنعمه الي هي فيها
      والله تتمنى نجلس نسولف بس سوالفه كلها عن الحريم
      او يسحب الكلام مني وبرضوا تكون السالفه عن الحريم

    2. طيب زوجي عادي يهرج بأي سالفه لمن يكون موجود احد معانا
      عن مواقف تصير له
      عن شغلات شافها
      عن مواضيع يناقش فيها
      بس لمن نكون لوحدنا يسكت
      وتضيع منه السوالف واغلب وقتنا ساكتين ولو فتحنا موضوع بيوم وعشره لا
      او بس انا اسولف وهو مستمع ولا يناقش ولا يسال
      لا تقول مو عاجبته السوالف بالعكس لمن اسكت يقول ايوه تكلمي
      كملي
      ليش مطلوب مني ادور على المواضيع الي يحبها اهو بس
      طيب انا ما احب السيارات والكلام عنهايطفشني مثل ماهو الكلام عن الملابس او الاسواق او الميك اب يطفشه ويزهق منه
      ليه ماتكون مواضيع محايده ومحببه للطرفين
      طفشت بس اطلب منه يسولف وهو ما يدري وش يرد
      ليش كذا معاي ومع غيري يسولف حتى لو كانوا حريم مثلي مثلا اخواته او امي

  3. اعتقد ان السبب الريسي لصمت الأزواج هو أنهم يخشون أن تخرج منهم معلومات لا يرغبون في أخراجها ، فيفضلون أن يصمتوا ويحولوا جدران بيوتهم لمنازل كئيبه خالية من التواصل على أن تفتضح أسرارهم …

  4. انا ما خليت برامج السيارات إلا وشفتها معاه و سرت احاوره بالشركات.. عشان اقترب له!! ولا سار شيء

  5. حتى انا يتجاوب معي اذا سألته عن الاكتئاب ويقول لي اكتتاب يا حظي ويقعد يشرح عن الاقتصاد والاسهم وهالسوالف واحلى سالفه عنده لما يتكلم عن ربعه الي سافرو بدون حريمهم والي تزوجو على زوجاتهم اونس شي عنده بس الحياة تمضي ولا يهمكم عيشو حياتكم وبس الحمدلله رب العالمين

  6. كلام الأخ عنزروت صحيح
    زوجي اكثر شيء يحبه الرياضه
    وافتح له موضوع عنها بعدها ماشاء الله
    مانخلي سالفه بخاطرنا

أضف تعليقاً

ولكن قبل أن تضيف تعليقك ...


أتمنى منك أن تقرأ هذا الموضوع وكذلك التعليقات جيداً قبل ان تكتب تعليقك ... والموقع يحتوي على العشرات من المواضيع الأخرى والتي قد تجيب على تساؤلك فحاول أن تتعاون معي وتتصفح الموقع قبل أن تستفسر عن موضوع معين
وللعلم فهناك صفحة مخصصة للاستشارات الأسرية رجاء أستخدمها اذا كنت تريد أن تكتب مشكلتك وتريد نصيحتي ... وأنتبه لأن التعليقات هنا يراها ويقرأها كل متابعي المدونة ، فلا تنشر قصة حياتك في التعليقات ... وتذكر بأن التعليقات تظهر فقط بعد أن اقرأها وأحدد بأنها صالحة للنشر ، فأنتبه لما تكتب بارك الله فيك ، وكل ما هو خارج النص وبعيد عن المنفعة العامة يتم حذفه
وتذكر بأن الموقع للبالغين والعقلاء .. فإذا كنت لا تستطيع أن تقرأ وتستوعب شيئاً مختلفاً عما تعودت على سماعه فكل ما عليك هو معاودة القراءة لمحاولة الفهم ، أو الأستفسار عما لم تفهمه ، ولكن ابتعد عن القذف والتجريح والاتهام فقد شبعت منه ولا يفيدني بشيء .. وأبتعد كذلك عن التعليقات السلبية .. ولا تتهجم على التعليقات الأخرى .. ولا تكتب تعليقاً بدون قراءة المواضيع بتمعن .. يمكنك أيضاً أن تنصحني أو ترشدني عن أخطائي بالأدلة لا بالأهواء
ولك مني جزيل الشكر
ملاحظة: إيميلك لن يظهر مع تعليقك على الموقع