زوج خالتي يتحرش ببنتي و بولد أخوي .. شو أسوي هل أواجهه .. وقد يتسبب ذلك في طلاق خالتي؟

 الأم : السلام عليكم اخوي عندي مشكله انو زوج خالتي وهوو مو كبير في بداية الثلاثينات .. كان يتحرش ببنتي الصغيرة ومن فترة تحرش بولد أخوي يعني يسوي معهم حركات مره وصخه مره مره .. مدري كيف اتصرف أخاف يكرر فعلته واخاف ينخرب بيت خالتي وتتطلق وانا ماقدر اسكت ودي ادق عليه واهاوشه وخص هو قدام الناس رجل محترم وينصح ومن وراء الناس يتحرش بالبنات والاولاد الصغار ..  وش الحل ؟!

العنزروت : وعليكم السلام،  حتى لو هاوشتيه ، هذا ما راح يردعه شي ،  وراح يكذبك وما راح يصدقك أحد لا خالتك ولا أي حد ثاني ،  لازم قبل لا تكلمينه تكلمين خوالك أو أي شخص كبير في العائلة ، مثل الوالد أو أخوك الكبير إذا موجودين ،  وبعدها لازم تخلين البنت والولد  اللي تحرش فيهم يقولوا شو عمل معهم بالضبط أمام أبوك أو أخوك الكبير وحتى خوالك ،  ولازم تحسسينهم بالأمان علشان يتكلموا،  وحتى لو تطلقت خالتك ،  طز وألف طز،  هذا جزاه الذبح مو بس الطلاق ،  لكن لا تكلميه مباشرة لأنه راح ينتبه ويهددك ويهدد البنات والاولاد  الصغار وراح يخافون يتكلمون ،  وراح يجهز الكذبه وفي هذه الحاله لما أي حد ثاني يواجهه راح يكون جاهز للكذب وما بتكون عنده ردة فعل طبيعية وارتباك وتخبط في الكلام ،  يعني لو كلمتيه راح تساعدينه ،  هذا فاسق مريض مختل شاذ ،  حتى لو وصل الأمر للطلاق عادي ،  المهم انقذي العيال الصغار اللي أصبح موضوعهم في رقبتك الحين

الأم : المشكله قدام الناس هو ملاك الرحمه والناس فلان فلان وهو راعي بلاوي الحين كلمت خواتي الكبار وقلت لهم عشان نقدر نوقفه عند حده انا مابي أي بنت يصير فيها أي شي بسبب ناس مريضه منافقه بس حسبي الله عليه .. أتمنى منك توعي الناس لو رسالة بسيطة أن ينتبهو لعيالهم من أي أحد اذا هذا تحرش بأطفال هو بالنسبه لهم مثل ابوهم .. أتمنى تخلي أمهات والآباء يعلمون عيالهم ذيي الإمكان ماحد يلمسها وانو يوقف معها .. بنتي كانت تقول: “خفت أنك تضربيني” هذا السبب خلاها ساكته لين طمنتها .. انت متابعينك واجد وكلامك مقنع وذو خبرة تكفى انصصصصحهم لايثقون ب أحد تكفى

العنزروت : يا ما تكلمت ولكن لا حياة لمن تنادي ولك ان ترجعي للكشكول وهي مدونه أقدم من العنزروت وقد كتبت فيها مواضيع كثيره جداَ عن التحرش الجنسي بالأطفال وخصوصاً موضوع “التحرش الجنسي بالاطفال …هل تعرف ما يجب عليك فعله لحماية أطفالك؟”

وقد نشر الموضوع في إحدى الجرايد المحلية ،  ولكن للأسف الناس ما تتعاون بالنشر لكي تعم الفائدة ، صحيح متابعيني كثر لكنهم لا يتحاوزون ألف شخص ولذلك كلامي ما يوصل بعيد ،  ولكن ولا يهمك بعيد نشر الموضوع للفائدة إن شاء الله

الأم : الله يجزاك كل خير ويسر أمرك ويحقق لك مطلبك ويسعدك ماقصرت في شي ربي يخليك لكل عين ترجيك ويسعدك ياما استتتفدت منك كثير وتغيرت أمور والفضل يرجع لربي ثم لك الله يوفقك الله يوفقك

العنزروت : آمين وإياكم إن شاء الله

 * ملاحظة: الكلمات اللي تحتها خط هي عبارة عن روابط

مع تمنياتي لكم بحياة زوجية سعيدة

عــبداللـه @ الــعــنــزروت™

وشكراً لمروركم ونشركم للوعي